Search

O modelo económico actual é basicamente lineal, o que significa que se utiliza sempre materia prima virxe para fabricar o produto que remata no vertedoiro ao final da fase de uso. Por tratarse dunha situación insostible a longo prazo, estase a buscar o o paso cara a unha economía circular. É aquí onde toman importancia os indicadores de circularidade, ferramentas para transmitir información de interese. O indicador de circularidade material (ICM), desenvolvido pola Fundación Ellen MacArthur, avalía o rendemento da circularidade a nivel de produto. O obxectivo deste traballo foi adecuar o ICM para poder ser utilizado en empresas agroalimentarias da provincia de Ourense, e evitar así a penalización das actividades vinculadas a este sector, usando para iso datos de tres casos concretos (vitivinícola, cárnico e lácteo). Abárcase o cálculo do ICM desde dous puntos de vista. Primeiro, calcúlase o ICM tendo en conta só o proceso global do produto e logo calcúlase o ICM’, atendendo ás diferentes etapas que conforman o proceso. A modificación proposta consiste na inclusión dunha nova variable que modifica a cantidade final de residuos destinados a vertedoiro/enerxía/outros non recuperables. Estas novas variables son o coeficiente de dixestibilidade (CDixest) e o coeficiente de uso (CUso). A inclusión destes dous factores de corrección melloran significativamente o valor de ICM e semella repercutir no valor do ICM’, cando o produto se pode considerar materia prima dun subproceso posterior